இருதலை எறும்பாகி போன 
சாய்ந்தமருதுக்கான 
உள்ளூராட்சி சபை விவகாரம்
------------------------------------------------------

- ஏ.எச்.சித்தீக் காரியப்பர்
-------------------------------------------------------
கல்முனைக்கு நான்கு உள்ளூராட்சி மன்றங்கள் என்ற கோரிக்கை வலுவடைந்துள்ள நிலையில், தமிழ் மக்கள் தரப்பில் அவர்களது பிரதிநிதிகள் இது தொடர்பில் இன்று கொழும்பில் கூடி ஆராய்ந்துள்ளனர்.

இதனையடுத்து அவர்கள் நாளை (31 ஆம் அமைச்சர் பைசர் முஸ்தபாவைச் சந்தித்து தங்கள் நிலைப்பாடு, கோரிக்கைகள் தொடர்பில்  விளக்கவுள்ளனர்.

இந்த விவகாரம் தொடர்பில் இன்றிரவு (30) நான் பல தமிழ் தரப்பு அரசியல்வாதிகளுடன் தொலைபேசியில் தொடர்பு கொண்டு கேட்ட போது அனைவரும் ஒரே கருத்தையே வலியுறுத்திக் கூறினர். இந்த விடயங்களையே அமைச்சர் பைசர் முஸ்தபாவிடம் நாளை முன்வைக்கப் போவதாகவும் தெரிவித்தனர்.

அவர்கள் தெரிவித்த கருத்துகளை ஒருமுகப்படுத்தி கீழே தருகிறேன்.

1. சாய்ந்தமருது மக்களின் நீண்டகால அபிலாஷையான  உள்ளூராட்சி சபை ஒன்றைப் பெற்றுக் கொள்ளல் என்ற விடயத்தில் தாங்கள் ஒரு  போதும் தடையாக இருக்கப் போவதில்லை. இந்த விடயத்தில் சாய்ந்தமருது மக்களுக்கு பக்கபலமாக நாங்களும் இருப்போம். அவர்களின் கோரிக்கை நியாயமானது.

2. ஆனால் கல்முனையை மேலும் மூன்று பிரிவுகளாக பிரிக்கும் யோசனை முற்றாக நாங்கள் எதிர்ப்பதுடன் அந்தக் கோரிக்கையை நிராகரிக்கிறோம்.

3. தற்போது கல்முனையில் முஸ்லிம்கள் 70 சத வீதமாகவும் தமிழர்கள் 30 சத வீதமாகவும் வாழ்கின்றனர். இந்த நிலையில், சாய்ந்தமருது தனியாகப் பிரியும் போது முஸ்லிம்கள்  60 சத வீதமாக குறைந்து, தமிழர்கள் எண்ணிக்கை 40 சத வீதமாக அதிகரித்தாலும்   கல்முனை மாநகர சபை நிர்வாகம் தமிழர்களின் கைகளுக்குச் சென்று விடுமே என எவ்வாறு அச்சம் கொள்ள முடியும்?

4. இந்த விடயத்தில் ஒரு தரப்பு முஸ்லிம்கள் மட்டும்   அச்சம் கொள்வதற்கு காரணம், மருதமுனை மக்களும் தமிழ்ப் பிரதேச மக்களும் ஒன்றிணைந்து கல்முனை மாநகர சபையின் நிர்வாகத்தைக் கைப்பற்றி விடுவார்களோ  என்பதுதான்.

5. முஸ்லிம்களின் ஒரு சாராரின் இவ்வாறான மேலாதிக்கப் போக்கு காரணமாகவே அவர்கள் இப்போது கல்முனையில் நான்கு பிரிவுகளை உருவாக்குமாறு கேட்கின்றனர்.

6. அதாவது, சாய்ந்தமருது தனியாகப் பிரிந்தால் மற்றைய பிரதேசங்களை மூன்றாகப் பிரிக்க வேண்டுமென விரும்புகின்றனர்.

  (அ) கல்முனைக்குடியையும் கல்முனையையும் சேர்த்து ஒரு சபையை உருவாக்குதல்.

 (ஆ) பாண்டிருப்பு, நீலாவணை, மருதமுனை ஆகிய மூன்று பிரதேசங்களையும் இணைத்து  ஒரு சபையை உருவாக்குதல்.

(இ) நற்பிட்டிமுனை மற்றும் சேனைக்குடியிருப்பு இரண்டையும் இணைத்து இன்னொரு சபை உருவாக்குதல் இதுவே இவர்களின் கோரிக்கை.

இவ்வாறானதொரு கோரிக்கையை நாங்கள் ஏற்றுக் கொள்ளப் போவதில்லை. சாய்ந்தமருது பிரிந்து போகட்டும். ஆனால் கல்முனைக்குடி உட்பட அனைத்து முஸ்லிம் பிரதேச மக்களுடன்  தமிழர்களாகிய நாங்கள் ஒன்றுமையாக வாழவே விரும்புகிறோம்.

இல்லை.. கல்முனை பிரதேசம் நான்காக பிரிக்கப்பட்டே ஆக வேண்டும் என்றால். தமிழர்களுக்கு ஓர்  உள்ளுராட்சி மன்றம் அங்கு உருவாக்கப்பட வேண்டும். அதாவது, கல்முனை பிரதேசத்தைச் சேர்ந்த தமிழ்க் கிராமங்களை ஒன்றிணைத்து ஓர் உள்ளூராட்சி மன்றம் எங்களுக்கென்று உருவாக்கப்பட வேண்டும்.

அதவாது நான்கில் ஒன்றை மட்டுமே நாம் எமக்காக கோருகிறோம். கல்முனை, பாண்டிருப்பு, நற்பிட்டிமுனை தமிழ்ப் பிரதேசம்,சேனைக்குடியிருப்பு, துரையிறங்கிய மேடை ஆகியனவற்றை இணைத்து தமிழர்களுக்கான ஓர் உள்ளுராட்சி மன்றம் உருவாக்கப்பட வேண்டும்.

எனவே, சாய்ந்தமருது தவிரந்த ஏனைய பிரதேச சபைகளை பிரிப்பதாயின் மேற்சொன்ன உடன்பாட்டின் கீழ் அது அமைய வேண்டும். இன்றேல். சாய்ந்தமருது தவிர ஏனையவற்றை பிரிக்க விடமாட்டோம்  இதனையே நாம் அமைச்சர் பைசர் முஸ்தபாவிடம் இன்று  தெரிவிக்கவுள்ளோம் என அவர்கள் கூறினர்

ஆக, மொத்தத்தில், தமிழர் தரப்பு விரும்பும் வகையில் கல்முனையை நான்காக பிரிப்பதற்கு அரசு தரப்பு உடன்பட்டாலும் ஸ்ரீலங்கா முஸ்லிம் காங்கிரஸ் அதனை மறுத்தால் சாய்ந்தமருதுக்கு பிரதேச சபை இல்லை.

நான்காக பிரிக்காமல் சாய்ந்தமருதுக்கு மட்டும்   உள்ளூராட்சி சபையை வழங்குங்கள் என்று தமிழர் தரப்பு தெரிவித்து அதனை அரசு ஏற்றுக் கொண்டாலும் சாயந்தமருதுவுக்கு மட்டும் தனியான உள்ளூராட்சி சபையை வழங்க ஸ்ரீலங்கா முஸ்லிம் காங்கிரஸ் விடப் போவதில்லை. 

அதேவேளை, முஸ்லிம் காங்கிரஸின் நான்கு கூறுகள் கோரிக்கையை அரசும் தமிழ் தரப்பும் ஏற்க மறுத்தாலும் சாய்ந்தமருதுவுக்கு உள்ளூராட்சி சபை என்று ஒன்று இல்லை என்பதே இங்கு தெளிவு.

- ஏ.எச்.சித்தீக் காரியப்பர்