தபால் மூல வாக்களிப்புக்கு பின் வந்தவரெல்லாம் ஒரு தலைவரா..?

( ஹபீல் எம்.சுஹைர் )

கடந்த ஜனாதிபதித் தேர்தல் மிக முக்கியத்துவம் வாய்ந்ததாக கருதப்பட்டது. மற்றவர்களுக்கு எப்படியோ, முஸ்லிம்களுக்கு மிகவும் முக்கியத்துவம் வாய்ந்தது என்பதை யாரும் மறுக்க முடியாது. இதனை முஸ்லிம் மக்கள் நன்கு அறிந்தும் வைத்திருந்தனர். முஸ்லிம் அரசியல் வாதிகள் அனைவரும் முன்னாள் ஜனாதிபதி மஹிந்த ராஜபக்ஸவுடன் இருந்த போதே, இலங்கை முஸ்லிம் மக்கள் தற்போதைய ஜனாதிபதி மைத்திரிக்கு ஆதரவான செயற்பாட்டை அமைத்திருந்தனர்.

இலங்கை முஸ்லிம் மக்கள், முஸ்லிம் அரசியல் வாதிகளும் தங்களோடு இணைந்து கொள்வார்களென எதிர்பார்த்தனர். ஒரு முஸ்லிம் அரசியல் தலைமை குறைந்தது தபால் மூல வாக்களிப்புக்கு முன்பாவது தனது தீர்மானத்தை எடுத்திருக்க வேண்டும். அதனடிப்படையில் அமைச்சர் றிஷாத், தனது முடிவை தபால் மூல வாக்களிப்புக்கு முன்பே அறிவித்திருந்தார். அமைச்சர் ஹக்கீமோ எந்த முடிவையும் எடுக்க முடியாமல் இருந்தார். 

இது பற்றி யாரவது கேட்டால், கட்சியை பாதுகாக்கவே அப்படி செய்ததாக சொல்கிறார். மக்களுக்காவே கட்சியாகும். அந்த கட்சியால் மக்களை சரியான நேரத்தில் வழி நடாத்த முடியாது என்றால், அந்த கட்சி இருப்பதை விட, இல்லாமல் இருப்பதே பொருத்தமானது. சமூக துரோகிகளையும் முஸ்லிம்களின் விடுதலைக்காக உருவாக்கப்பட்ட மு.கா அரவணைத்து செல்ல வேண்டிய தேவை இல்லை. குறித்த அமைச்சர் ஹக்கீமின் நியாயத்தின் மூலம், மு.காவில் சமூக துரோகிகள் மலிந்து கிடக்கின்றமை தெளிவானது. அமைச்சர் ஹக்கீமின் தலைமைத்துவம் மிகத் தவறானது என்பதை விளங்க, இதனை விட பெரிதான ஆதாரங்கள் தேவையில்லை.